Carl-Gustaf Severin
Carl-Gustaf er eftir hondini vorðin ein kendur talari í Føroyum. Hann hevur áður talað á tveimum páskastevnum í Kelduni, og tað er ein sonn gleði, at hann enn einaferð kemur til Føroya.
Carl-Gustaf kemur úr Svøríki og er best kendur fyri sítt arbeiði í fyrrverandi Sovjetsamveldinum, har hann í 90’unum ótroyttiliga ferðaðist við gleðiboðskapinum og saman við øðrum gjørdi eitt stórt arbeið at uppbyggja samkomur kring landið. Ávøksturin av hesum arbeiði er ovurhonds stórur, og í dag eru hundraðvís av samkomum sprotnar í Russlandi.
Seinastu árini hevur Carl-Gustaf brúkt nógva tíð og orku uppá yngra ættarliðið. Hann hevur longst eftir at sæð slóðbrótatar innan missión og ynskt at sæð ungar evangilistar reist seg.
Hetta er ein maður við einum stórum hjarta, fevnandi persónligheit og fantastiskum vitnisburðum.
Joel Ramsey
Joel 33 ára gamal og kemur úr Brisbane, Avstralia. Hann er giftur við Savannah, og saman eiga tey dóttrina Avila Rose. Joel hevur í nógv ár arbeitt í stóru altjóða samkomuni Citipointe Church í Brisbane, har pápi hansara er samkomuleiðari.
Í 2017 fluttu hann og konan til Suðurafrika. Har hava tey virkað sum trúboðarar og saman stovnað felagsskapin ”Awaken Africa”, sum hevur til endamáls at spreiða Guds kærleika og boðskapin um Hansara náði og kraft yvir alt Afrika. Eftir smá tvey ár har, eru tey nú flutt aftur til Avstralia.
Joel hevur eitt hjarta, ið brennir fyri, at gleðiboðskapurin skal koma út til øll menniskju – til rík og fátæk, til veik og sterk, til kend og gloymd. At síggja menniskju verða møtt av Jesusi, sett í frælsi og grødd. Hann er nógv umbiðin um allan heim at bera fram júst hesi gleðiboð. Tað, sum eyðkennir hansara møtir, er, at har henda nógv undur og tekin.
Fyri tveimum árum síðani vóru Joel og Savannah í Føroyum og hildu eina møtirøð. Vit gleða okkum aftur at kunnu bjóða honum vælkomnum.
Sebastian Stakset
Sebastian er best kendur fyri at vera rappari og forsangari í rappbólkinum ”Kartellen” undir navninum “Sebbe Staxx.” Hann er 33 ára gamal og kemur úr Svøríki.
Hann var kendur fyri at liva eitt hart lív við rúsevnismisnýtslu og ógvuliga óstøðugum og hørðum lívsstíli, har hann eisini hevur sitið í fongsli. Í 2016 møtti hann Jesusi, og tá broyttist alt. Hann varð fullkomiliga umvendur og legði gamla lívsstílin aftur um seg.
Sebastian hevur síðani brúkt nógva tíð og orku at ferðast um við gleðiboðskapinum um Jesus – serliga til tey, ið eru brotin og hava mist lívsmótið. Hann vitjar m.a. í fongslum og lukkaðum heimum fyri ungdóm, sum meira ella minni eru uppgivin av myndugleikunum, og hann upplivir, at menniskju í hópatali verða frelst og loyst.
Í 2017 gav hann út bókina: “Bara ljuset kan besegra mörkret”. Har greiðir hann frá ferðini úr myrka lívinum og inn í lívið saman við Jesusi.
